Asa maharitra sy mateza no hatao manomboka izao amin’ny fanamboarana ireo lakan-drano na tatatra mitondra ireo rano maloto any anatin’ny faritra iva mba tsy hisian’ny tondran-drano miverim-berina saika isan-taona. Anisany fanentanana nataon’ny minisitry ny fanajariana ny tany sy ny fitsinjaram-pahefana Hajo Andrianainarivelo tamin’ireo mpiara-miombon’antoka mpamatsy vola sy ireo teknisianina miandraikitra ny fanamboarana, izany androany nandritra ny fidinanana ifotony nijery ireo asa fanamboarana ny lakan-drano teny Andranomanalina, nijereny ifotony ihany koa ny fasahiaranana manjo ireo mponina vokatry ny loto sy ny tsy fahampian’ny fotodrafitrasa fanaovana sy fanariana maloto, ireo mponina izay miaina tanteraka ao anatin’ny fasahiranana sy ny rano maloto eny anelakela-trano ny ankamaroany.

Vahaolana avy hatrany no nentin’ny minisitra sy ireo teknisianina ary ireo lehiben’ny fokontany, nahita maso ny fasahiranana sy ny tsy fahampian’ny fotodrafitrasa mahakasika ny fahadiovana eny amin’ny faritra Andranomanalina iny. Tsy maintsy harindra manomboka izao ny asa rehetra hatao amin’ny faritra iva, hisy avy hatrany ny fihaonan’ireo mpiara-miombon’antoka rehetra ny Alakamisy 11/08/11 handaminana izany, ampiana ireo fotodrafitr’asa iombonana fanariana sy fanaovana maloto, hanome tanana amin’izany ny ministeran’ny fanajariana ny tany sy ny fitsinjaram-pahefana saingy miankina amin’ny fisian’ny tany malalaka hanorenana izany, asa mafy sy maharitra no hanamboarana ireo lakan-drano, mbola hanome tanana ihany koa ny ministeran’ny fanajariana ny tany sy ny fitsinjaram-pahefana, efa manomboka ihany koa ny asa. Mpiaramiombon’antoka maro no indray mifarimbona amin’ny fanatsarana ny faritra iva, eo ny FID miandraikitra ny fanadiovana fanalana ireo fotaka amin’ny lakandrano sy fanomezana asa ny mponina miisa 450 amin’ny alalan’ny asa tanamaro na HIMO efa manomboka ny asa, ny UNICEF amin’ny fanorenana ireo toeram-pivoahana sy ny fanentanana, ny ANDAOI amin’ny fametrahana ireo dabam-pako, ny AGETIPA manao ny rary vato amin’ireo lalan-kely, efa mitsangana ihany koa ny rafitra iray eo ambany fiahian’ny commune Antananarivo renivohitra ny amin’ny fikojana ny rano, fahadiovana sy fidiovana, hananganana io rafitra io avokoa ny fokontany 192. Araka ny voafaritra eo anivon’ny commune Antananarivo renivohitra dia fokontany amin’ny faritra iva miisa 44 no hanaovana tetikasa fanatsarana sy fanadiovana, tahaka ny ao Andranomanalina. Raha ireo mpiara-miombonantoka rehetra ireo no manao ny andraikiny tsara dia ho afaka amin’ny loto sy ny tondra-drano ny faritra iva, saingy misy amin’ireo mpiara-miombon’antoka no zavatra kely sy zara fa vita no nataony dia dradradraina amin’ny gazety sy aino aman-jery dia ohatra ny nahavita zavatra betsaka nefa rehefa jerena ifotony dia omaly tsy miova ihany ny faritra iva, ka mahatonga ny vahoaka malahelo sy tezitra indraindray. Anisany nankasitrahan’ny vahoaka tokoa ny fidinan’ny minisitra mitety ireo elakelan-trano teny Andranomanalina, ny minisitry ny fanajariana ny tany sy ny fitsinjaram-pahefana izay matetika midina eny amin’iny faritra iva iny manara-maso ireo asa atao.

• < Précédent
• Suivant >